About Open Data Policy

ಪರಿಚಯ

ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು 8816 ವಾಹನಗಳೊಂದಿಗೆ ಪ್ರತಿನಿತ್ಯ 30.02 ಕಿಲೋಮೀಟರ್ ಕಾರ್ಯಾಚರಣೆ ಮಾಡುತ್ತಿದ್ದು ಈ ವಾಹನಗಳ ಕಾರ್ಯಾಚರಣೆಗಳ ಸ್ಥಿತಿಗತಿಗಳನ್ನು ಪರಿಶೀಲಿಸುವ ಸಲುವಾಗಿ ಜಿಪಿಎಸ್ ಉಪಕರಣಗಳನ್ನೊಳಗೊಂಡ ವ್ಯವಸ್ಥೆಯನ್ನು ನಿಗಮದ ವ್ಯಾಪ್ತಿಗೆ ಒಳಪಡುವ ರಾಮನಗರ, ಬೆಂಗಳೂರು ಕೇಂದ್ರೀಯ, ಮೈಸೂರು ಗ್ರಾಮಾಂತರ, ಮಂಗಳೂರು ಹಾಗೂ ಪುತ್ತೂರು ವಿಭಾಗಗಳಲ್ಲಿ ಅಳವಡಿಸಲಾಗಿರುತ್ತದೆ. ಹಾಗೆಯೇ ನಿಗಮವು ಮೈಸೂರು ನಗರ ಸಾರಿಗೆ ವಿಭಾಗದ ನಾಲ್ಕು ಘಟಕಗಳ ಎಲ್ಲಾ 500 ವಾಹನಗಳಿಗೆ ಜಾಣ ಸಾರಿಗೆ ವ್ಯವಸ್ಥೆಯನ್ನು ಅಳವಡಿಸಿ ನಿಯಂತ್ರಿಸಲಾಗುತ್ತದೆ. ನಿಗಮವು ಈ ವಾಹನಗಳ ಕಾರ್ಯಾಚರಣೆ ಮೇಲ್ವಿಚರಣೆಗಾಗಿ ವಿ.ಟಿ.ಎಂ.ಎಸ್ ಯೋಜನೆಗೆ ಬೆಂಗಳೂರಿನಲ್ಲಿ ಹಾಗೂ ಜಾಣ ಸಾರಿಗೆ ಯೋಜನೆಗೆ ಮೈಸೂರಿನಲ್ಲಿ ಕೇಂದ್ರ ನಿಯಂತ್ರಣಾ ಕೊಠಡಿಗಳನ್ನು ಸ್ಥಾಪಿಸಲಾಗಿದೆ. ಪ್ರಸುತ ನಿಗಮವು ವಾಹನವಿರುವ ಸ್ಥಳವನ್ನು ಪ್ರಯಾಣಿಕರಿಗೆ ಕ್ಷಿಪ್ರಸಂದೇಶ (ಎಸ್.ಎಂ.ಎಸ್), ಧ್ವನಿ ಆಧಾರಿತ ಸೇವೆ (ಐ.ವಿ.ಆರ್.ಎಸ್), ಪ್ರಯಾಣಿಕರ ತಾಣದ ಮಾಹಿತಿ ಫಲಕ ಮತ್ತು ಮೊಬೈಲ್ ಆಪ್ಗಳ ಮೂಲಕ ಮಾಹಿತಿ ಒದಗಿಸಲಾಗುತ್ತಿದೆ. ಹಾಗೆಯೇ ಕೆಲವು ಕಂಪನಿಗಳು ಹಾಗೂ ವ್ಯಕ್ತಿಗಳು ದತ್ತಾಂಶವನ್ನು ಉಪಯೋಗಿಸಿಕೊಂಡು ತಂತ್ರಾಂಶಗಳ ಮೂಲಕ ಮಾಹಿತಿಯನ್ನು ನೀಡಲು ಮುಂದೆ ಬಂದಿರುತ್ತಾರೆ. ಇದರಲ್ಲಿ ಸಾಮಾನ್ಯ ವಿಧ್ಯಾರ್ಥಿಯಿಂದ ಅಂತರಾಷ್ಟ್ರೀಯ ತಂತ್ರಾಂಶ ಅಭಿವೃಧ್ದಿಕಾರರು ಒಳಗೊಂಡಿರುತ್ತಾರೆ. ಇವರೆಲ್ಲರಿಗೂ ನಿಗಮವು ಮಾಹಿತಿ ತಂತ್ರಜ್ಞಾನದ ದತ್ತಾಂಶ ಹಂಚಿಕೆ ನೀತಿಯ ಅನ್ವಯ ಪ್ರಯಾಣಿಕರಿಗೆ ಅನುಕೂಲವಾಗುವ ಮಾಹಿತಿಯ ದತ್ತಾಂಶವನ್ನು ಮುಕ್ತವಾಗಿ ನೀಡಲು ತೀರ್ಮಾನಿಸಿರುತ್ತದೆ.

ಸೈನ್ ಇನ್ ಮಾಡಿ ಅಥವಾ ಡೇಟಾ ಫೀಡ್ಗಳಿಗಾಗಿ ನೋಂದಾಯಿಸಿ

ಸೈನ್ ಅಪ್/ನೋಂದಣಿ

ದತ್ತಾಂಶ ಹಂಚಿಕೆ ನೀತಿಯ ಅವಶ್ಯಕತೆ

ಮೈಸೂರು ಜಾಣಸಾರಿಗೆ ವ್ಯವಸ್ಥೆ/ವಾಹನ ಪಥ ಸಂಚಲನ ಮತ್ತು ಮೇಲ್ವಿಚಾರಣೆ ವ್ಯವಸ್ಥೆಗಳು ಒದಗಿಸುವ ವಾಹನಗಳ ನಿರೀಕ್ಷಿತ ಆಗಮನ ಸಮಯ (ಇ.ಟಿ.ಎ) ಮತ್ತು ನಿರೀಕ್ಷಿತ ನಿರ್ಗಮನ ಸಮಯ (ಇ.ಟಿ.ಡಿ) ಸಮಯದ ನೈಜ ಮಾಹಿತಿಗಳು ಸಾರ್ವಜನಿಕ ಪ್ರಯಾಣಿಕರಿಗೆ ಉಪಯುಕ್ತವಾಗಿರುತ್ತದೆ. ಹಲವಾರು ವಾಣಿಜ್ಯೋದ್ಯಮಿಗಳು/ಪ್ರಾರಂಭಿಕ ಕಂಪನಿಗಳು ನಿಗಮದ ವಾಹನಗಳ ಸ್ಥಿರ ವೇಳಾಪಟ್ಟಿ ಮತ್ತು ಐ.ಟಿ.ಎಸ್/ವಿ.ಟಿ.ಎಂ.ಎಸ್ ಮೂಲಕ ಲಭ್ಯವಾಗುತ್ತಿರುವ ಇ.ಟಿ.ಎ ಮತ್ತು ಇ.ಟಿ.ಡಿ ನೈಜ ಮಾಹಿತಿಯನ್ನು ಕೋರಿದ್ದು ಅವುಗಳನ್ನು ತಮ್ಮ ಗ್ರಾಹಕರುಗಳಿಗೆ ಇತರೆ ಮಾಹಿತಿಗಳೊಂದಿಗೆ ಸೇರಿಸಿ ಒದಗಿಸಲು ಇಚ್ಚಿಸಿರುತ್ತಾರೆ. ಆ ಮೂಲಕ ತಮ್ಮ ವ್ಯವಹಾರವನ್ನು ಅಭಿವೃಧ್ಧಿಪಡಿಸಿಕೊಳ್ಳುವುದರ ಜೊತೆಗೆ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮದ ವಾಹನಗಳಲ್ಲಿ ಹೆಚ್ಚು ಪ್ರಯಾಣಿಕರು ಸಂಚರಿಸಲು ಅನುಕೂಲವಾಗುತ್ತದೆ ಎಂಬ ಆಶಯವನ್ನು ವ್ಯಕ್ತಪಡಿಸಿರುತ್ತಾರೆ. ಇದಲ್ಲದೇ ಹಲವಾರು ಶಿಕ್ಷಣ ಸಂಸ್ಥೆಗಳು, ಸಂಶೋಧನಾ ಸಂಸ್ಥೆಗಳು, ಸಾರ್ವಜನಿಕ ವಲಯದ ಸಂಸ್ಥೆಗಳು, ಪರ್ಯಾಯ ಸಾರಿಗೆ ಸೇವೆಯನ್ನು ಒದಗಿಸುವ ಕಂಪನಿಗಳು ಮುಂತಾದವುಗಳಿಗೆ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು ಮುಕ್ತ ದತ್ತಾಂಶ ಹಂಚಿಕೆ ವ್ಯವಸ್ಥೆ ಅನುಕೂಲಕರವಾಗಿರುತ್ತದೆ. ಸಾರ್ವಜನಿಕ ಪ್ರಯಾಣಿಕರಿಗೂ ಸಹ ಈ ಮಾಹಿತಿಯಿಂದ ಉಪಯೋಗವಾಗುತ್ತದೆ. ಈ ಹಿನ್ನಲೆಯಲ್ಲಿ ನಿರಂತರವಾಗಿ ಐ.ಟಿ.ಎಸ್/ವಿ.ಟಿ.ಎಂ.ಎಸ್ ವ್ಯವಸ್ಥೆಗಳ ಮೂಲಕ ಉತ್ಪನ್ನವಾಗುವ ಬೃಹತ್ ಮಾಹಿತಿಯನ್ನು ನಿಗಮಕ್ಕೆ ಅನುಕೂಲವಾಗುವಂತಹ ಮಾದರಿಯಲ್ಲಿ ಹಾಗೂ ಸಾರ್ವಜನಿಕ ಪ್ರಯಾಣಿಕರ ಭಧ್ರತೆ ಮತ್ತು ಖಾಸಗಿತನಕ್ಕೆ ತೊಂದರೆಯಾಗದಂತೆ ದತ್ತಾಂಶವನ್ನು ಹಂಚಿಕೆ ಮಾಡಲು ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು ಮುಕ್ತ ದತ್ತಾಂಶ ಹಂಚಿಕೆ ನೀತಿಯನ್ನು ಅಳವಡಿಸಲು ಉದ್ದೇಶಿಸಿರುತ್ತದೆ. ಈ ರೀತಿಯ ಮುಕ್ತ ದತ್ತಾಂಶ ಹಂಚಿಕೆಯ ಉಪಕ್ರಮದಿಂದ ಸಾರ್ವಜನಿಕರಿಗೆ ಅನುಕೂಲವಾದ ಮಾಹಿತಿ ಲಭ್ಯವಾಗಿ ನಿಗಮದ ವಾಹನಗಳಲ್ಲಿ ಪ್ರಯಾಣಿಕರ ದಟ್ಟಣೆ ಹೆಚ್ಚಾಗುವುದರ ಜೊತೆಗೆ ಪರಿಸರ ಮಾಲಿನ್ಯ ಕಡಿಮೆಯಾಗುವುದರ ಜೊತೆಗೆ, ಸಾರ್ವಜನಿಕರಿಗೆ ನಿಗಮದ ಬಗ್ಗೆ ಒಳ್ಳೆಯ ಭಾವನೆ ಮೂಡಿಸಲು ಸಹಕಾರಿಯಾಗುತ್ತದೆ.

ದತ್ತಾಂಶ ಮಾಹಿತಿ ಬಳಕೆಗೆ ಬಗ್ಗೆ

ಐ.ಟಿ.ಎಸ್/ವಿ.ಟಿ.ಎಂ.ಎಸ್ ವ್ಯವಸ್ಥೆಯಲ್ಲಿ ಲಭ್ಯವಾಗುವ ಮಾಹಿತಿಗಳನ್ನು ಕೆಳಕಂಡ ವಿಶಾಲ ಉದ್ಧೇಶಗಳಿಗೆ ಉಪಯೋಗಿಸಬಹುದಾಗಿರುತ್ತದೆ.

ಪ್ರಸರಣ : ಸಾರ್ವಜನಿಕ ಮತ್ತು ಖಾಸಗಿ ಜಾಲತಾಣಗಳಲ್ಲಿ, ಮೊಬೈಲ್ ಆಪ್ಗಳಲ್ಲಿ ನೈಜ ಬಸ್ ಸಮಯದ ಮಾಹಿತಿಗಳನ್ನು ಸಾರ್ವಜನಿಕರಿಗೆ ಪ್ರಯಾಣಿಸಲು ಅನುಕೂಲವಾಗುವಂತೆ ಪ್ರಸರಣ ಮಾಡಬಹುದಾಗಿರುತ್ತದೆ.
ಸಂಶೋಧನೆ ಮತ್ತು ಅಭಿವೃಧ್ಧಿ : ಸಾರ್ವಜನಿಕರ ಒಟ್ಟಾರೆ ಅನುಕೂಲಕ್ಕಾಗಿ ಹೊಸ ರೀತಿಯಲ್ಲಿ ಮಾಹಿತಿ ಒದಗಿಸುವ ಸೇವೆಗಳನ್ನು ಅಭಿವೃಧ್ಧಿಪಡೆಯಬಹುದಾಗಿರುತ್ತದೆ.
ಶೈಕ್ಷಣಿಕ ಅಧ್ಯಯನಗಳು : ಸಾರಿಗೆ ತಂತ್ರಜ್ಞರು, ಬೃಹತ್ ದತ್ತಾಂಶ ಪರಿಣಿತರು, ಸಂಶೋಧಕರು ಮುಂತಾದ ಪರಿಣತರು ಮಾಹಿತಿಯನ್ನು ತಮ್ಮ ಪರಿಣಿತಿಯುಳ್ಳ ಕ್ಷೇತ್ರಗಳಲ್ಲಿ ಅಧ್ಯಯನ ಮತ್ತು ಸಲಹೆಗಳಿಗಾಗಿ ದತ್ತಾಂಶ ಮಾಹಿತಿಯನ್ನು ಉಪಯೋಗಿಸಬಹುದಾಗಿದೆ.
ಕಾರ್ಯತಂತ್ರದ ವಿನ್ಯಾಸ : ಸಾರ್ವಜನಿಕ ನೀತಿಗಳನ್ನು ರೂಪಿಸುವುದಕ್ಕಾಗಿ ಮತ್ತು ನಗರ ಸಾರಿಗೆ ಯೋಜನೆಗಳನ್ನು ರೂಪಿಸುವುದು ಮುಂತಾದ ನೀತಿ, ನಿರೂಪಣೆಯ ಕಾರ್ಯಕ್ಕಾಗಿ ವಿವಿಧ ಸಂಸ್ಥೆಗಳು ಬಳಸಬಹುದಾಗಿದೆ.
ಕಾರ್ಯಾಚರಣೆ ಯೋಜನೆಗಳಿಗಾಗಿ : ದೈನಂದಿನ ಸಾರಿಗೆ ಮೇಲ್ವಿಚಾರಣೆ ಮತ್ತು ವಿವಿಧ ಪರಿಸ್ಥಿತಿಗಳಲ್ಲಿ ಕಾರ್ಯಾಚರಣೆ ನಿರ್ವಹಣೆಗಾಗಿ ಮಾಹಿತಿಯನ್ನು ಬಳಸಬಹುದಾಗಿದೆ.
ಸಂಚಾರಕ್ಕೆ ಸಂಬಂಧಿಸಿದ ಕೊಡುಗೆಗಳ ಅಭಿವೃಧ್ಧಿ : ಇತರೆ ವಾಣಿಜ್ಯ ಸೇವೆಗಳನ್ನು ಒದಗಿಸುತ್ತಿರುವ ವ್ಯಕ್ತಿ ಅಥವಾ ಸಂಸ್ಥೆಗಳು ಅವುಗಳ ಜೊತೆಯಲ್ಲಿ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮಕ್ಕೆ ಅನುಕೂಲವಾಗುವಂತೆ ದತ್ತಾಂಶ ಮಾಹಿತಿಯನ್ನು ಉಪಯೋಗಿಸಬಹುದಾಗಿದೆ.
ಇತರೆ ಸೇವೆಗಳ ಅಭಿವೃಧ್ಧಿ : ಸಾಮಾಜಿಕ / ಆರ್ಥಿಕ ಅನುಕೂಲತೆಗಳಿಗಾಗಿ ಸಹ ಈ ಮಾಹಿತಿಗಳನ್ನು ಉಪಯೋಗಿಸಬಹುದಾಗಿದೆ.

ಅನುಷ್ಠಾನದ ವಿಧಾನ (ಅಳವಡಿಕೆಯ ಹಾದಿ)

ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು ಮೈಸೂರು ಜಾಣ ಸಾರಿಗೆ ವ್ಯವಸ್ಥೆಯ ವ್ಯಾಪ್ತಿಯಲ್ಲಿ ಬರುವ ಬಸ್ ಸಂಚಾರದ ವಿವರಗಳನ್ನು ಮುಕ್ತ ದತ್ತಾಂಶ ಮಾಹಿತಿ ಹಂಚಿಕೆ ಮಾಡಲು ನಿರ್ಧರಿಸಿರುತ್ತದೆ.ಮುಂದಿನ ದಿನಗಳಲ್ಲಿ ಸಾರ್ವಜನಿಕ ಪ್ರಯಾಣಿಕರಿಂದ ಬರುವ ಪ್ರತಿಕ್ರಿಯೆ ಅವಲಂಬಿಸಿ ದೂರ ಸ್ಥಳಗಳಿಗೆ ಕಾರ್ಯಾಚರಣೆಯಾಗುವ ಸಾರಿಗೆಗಳ ಮಾಹಿತಿಯನ್ನು ವಿಟಿಎಂಎಸ್ ವ್ಯವಸ್ಥೆಯ ಮೂಲಕ ಒದಗಿಸಲು ಕ್ರಮ ಕೈಗೊಳ್ಳಲಾಗುವುದು.
ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು ಮೈಸೂರು ಜಾಣ ಸಾರಿಗೆ ವ್ಯವಸ್ಥೆಯಲ್ಲಿನ ದತ್ತಾಂಶಗಳನ್ನು ಪಡೆಯಬಯಸುವವರು ಒಪ್ಪಂದ ಮಾಡಿಕೊಳ್ಳಬೇಕಿದ್ದು, ಸದರಿ ಒಪ್ಪಂದದ ನಿಯಮಗಳನ್ನು ತಿಳಿಸುವ ದಸ್ತಾವೇಜನ್ನು ಸಿದ್ದಪಡಿಸಿದ್ದು, ಅದನ್ನು ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮದ ಜಾಲತಾಣದಲ್ಲಿ ಪ್ರಸ್ತುತ ಪಡಿಸಿದ್ದು, ಆಸಕ್ತರು ಜಾಲತಾಣದಲ್ಲಿ ಮಾಹಿತಿಗಾಗಿ ಕೋರಿಕೆಯನ್ನು ಸಲ್ಲಿಸಬಹುದಾಗಿದ್ದು, ಮೊದಲಿಗೆ ಆನ್ಲೈನ್ ನೋಂದಣಿಯನ್ನು ಮಾಡಬೇಕಾಗಿರುತ್ತದೆ. ಎಲ್ಲಾ ವಿವರಗಳು ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮದ ಜಾಲತಾಣದಲ್ಲಿ ಲಭ್ಯವಿರುತ್ತದೆ.
ಒಪ್ಪಂದದ ನಿಯಮಗಳು ದತ್ತಾಂಶ ಹಂಚಿಕೆಯ ವಾಸ್ತುಶಿಲ್ಪ, ದತ್ತಾಂಶ ಬಳಕೆ, ಹೊಣೆಗಾರಿಕೆ,ವ್ಯಾಪಾರ ಮುದ್ರೆ, ಅನುಮೋದನೆ ನೀಡುವ ಬಗ್ಗೆ, ಮುಕ್ತಾಯಗೊಳಿಸುವ ಬಗ್ಗೆ ಮುಂತಾದ ವಿವರಗಳನ್ನು ಹೊಂದಿರುತ್ತದೆ.
ಆಸಕ್ತರು ಜಾಲತಾಣದಲ್ಲಿರುವ ಮಾರ್ಗದರ್ಶಿ ಸೂತ್ರಗಳನ್ನು, ಒಪ್ಪಂದದ ನಿಯಮಗಳನ್ನು ಮತ್ತು ಮುಕ್ತಾಯದ ಷರತ್ತುಗಳನ್ನು ಸ್ಪಷ್ಟವಾಗಿ ಅರ್ಥಮಾಡಿಕೊಂಡು ಒಪ್ಪಂದ ಮಾಡಿಕೊಳ್ಳಲು ಸೂಚಿಸಲಾಗಿದೆ.
ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು ಮುಂದಿನ ದಿನಗಳಲ್ಲಿ ವಿ.ಟಿ.ಎಂ.ಎಸ್/ಅವತಾರ್ ಇತ್ಯಾದಿ ವ್ಯವಸ್ಥೆಗಳ ಮಾಹಿತಿಯನ್ನು ಒದಗಿಸಲು ಒಪ್ಪಂದದ ನಿಯಮಗಳನ್ನು ಸಿದ್ದಪಡಿಸಲು ಯೋಜಿಸಿರುತ್ತದೆ.

ಮುಕ್ತ ದತ್ತಾಂಶ ಹಂಚಿಕೆ ನೀತಿಯನ್ನು ಪರಿಷ್ಕರಣೆ ಮಾಡುವ ಬಗ್ಗೆ

ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು ಬಳಕೆದಾರರಿಂದ ಬರುವ ಪ್ರತಿಕ್ರಿಯೆ, ದತ್ತಾಂಶ ಪ್ರವೇಶ, ಅಂಕಿಅಂಶ, ತಾಂತ್ರಿಕ ಸವಾಲುಗಳು ಮತ್ತು ಬದಲಾವಣೆಗೊಳಗಾಗುವ ಕಾನೂನುಗಳು ಮುಂತಾದ ಅಂಶಗಳನ್ನು ಆಧರಿಸಿ, ದತ್ತಾಂಶ ಹಂಚಿಕೆ ನೀತಿಯಲ್ಲಿ ಅವಶ್ಯವೆನಿಸಿದಲ್ಲಿ ಸೂಕ್ತ ಬದಲಾವಣೆಗಳನ್ನು ಮಾಡಲು ಕ್ರಮ ಕೈಗೊಳ್ಳಲಾಗುವುದು.ಅಂತಿಮವಾಗಿ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು ಮುಕ್ತ ದತ್ತಾಂಶ ಹಂಚಿಕೆ ನೀತಿಯನ್ನು ಕಾಲಾನುಕಾಲಕ್ಕೆ ಪರಿಷ್ಕರಿಸುವ ತನ್ನ ಹಕ್ಕನ್ನು ಕಾಯ್ದಿರಿಸಿಕೊಂಡಿದೆ.